ដោយ ចង់ចូលរួមនូវសកម្មភាពមនុស្សធម៌នានា ជាមួយកាកបាទក្រហមកម្ពុជា និងជាមួយរដ្ឋាភិបាល លោក ឧកញ៉ា ឌីប៉ូ ប្រធានក្រុមហ៊ុន អេង ឌីប៉ូអភិវឌ្ឍន៍ បាននាំយកថវិកាចំនួន ៤ ម៉ឺនដុល្លារ ទៅប្រគល់ជូនកាកបាទក្រហមកម្ពុជា កាលពីព្រឹកថ្ងៃទី៨ ខែឧសភា ឆ្នាំ២០១៥ នៅទីស្នាក់ការកណ្តាល កាកបាទក្រហម ក្នុងពិធីប្រារព្ធខួបលើកទី១៥២ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ប្រធាបទ “កំលាំងមនុស្សធម៌ៈ គោលការណ៍គ្រឹះ នៅក្នុងសកម្មភាព”។ សូមបញ្ជាក់ផងដែរថា ក្រុមហ៊ុន អេងឌី ប៉ូអភិវឌ្ឍន៍ ត្រូវបានទទួលសិទ្ធិពីរាជរដ្ឋាភិបាលធ្វើការអភិវឌ្ឍន៍វិស័យកសិកម្ម ដំណាំស្រូវលើទំហំដី ១៦៩០ ហិកតា ចាប់តាំងពីឆ្នាំ២០០៦ រហូតដល់ឆ្នាំ២០០៩ ក្រុមហ៊ុនជួបការលំបាកបញ្ហាមួយចំនួនរឿងវិវាទដីធ្លីជាមួយឈ្មួញ ខិលខូច ឆ្នាំ២០០៩ ឆ្នាំ២០១០ ទើបក្រុមហ៊ុន អាចដំណើរការបង្កបង្កើនផលស្រូវ បានលើផ្ទៃដីទំហំ ៣១៥ ហិកតា ទទួលបានទិន្នផលស្រូវ ចាប់ពី ៤ តោន ទៅ ៥ តោន ក្នុង ១ ហិកតា។ ដោយមានការជួយជ្រោមជ្រែង និងគាំទ្រពីក្រសួងកសិកម្ម រុក្ខាប្រមាញ់ និងនេសាទ ផ្ដល់ការលើកទឹកចិត្ដឲ្យក្រុមហ៊ុនបន្ដដំណើរការដាំដុះស្រូវ ឲ្យមានគុណភាពក្រសួង ក៏បានផ្ដល់អ្នកបច្ចេកទេស និងផ្ដល់ពូជស្រូវ យកមកធ្វើការដាំដុះទទួលបានទិន្នផលល្អច្រើនជាងមុន ជាក់ស្តែង នៅឆ្នាំ២០១៣-២០១៤ ក្រុមហ៊ុនបានពង្រីកផ្ទៃដីបន្ថែម ៧៦៨ ហិកតា ដោយក្នុង ១ ហិកតា ទទួលផលបាន ៥ តោនទៅ ៧ តោន។ នៅឆ្នាំ២០១៤-២០១៥ ក្រុមហ៊ុនបានពង្រីកផ្ទៃដីបន្ថែម ៨៤៣ ហិកតា ហើយនៅថ្ងៃខាងមុខនេះ ក្រុមហ៊ុន និងធ្វើការពង្រីកផ្ទៃដីបន្ថែមឲ្យគ្រប់តាមផែនការ ចំនួន ១៦៩០ ហិកតា។ ក្រុមហ៊ុនទទួលយកកម្លាំងពលកម្ម មកបម្រើការងារនៅទីនេះ ចំនួន ១៨៦ នាក់ ក្នុងនោះ មានស្ដ្រី ១៥ នាក់។ដោយទទួលបាន ការអនុញ្ញាតឲ្យអភិវឌ្ឍន៍លើដីសម្បទានសេដ្ឋកិច្ច “គម្រោងអភិវឌ្ឍន៍កសិកម្មសុខសែនជ័យ” លើផ្ទៃដីទំហំ ១៦៩០ ហិកតា ក៏ពិតមែន ប៉ុន្តែផ្ទៃដីទាំងអស់ខាងលើ ត្រូវបានប្រជាពលរដ្ឋក្នុងមូលដ្ឋានឃុំកំពង់អុស និងក្រៅមូលដ្ឋាននេះ បានអាស្រ័យផលពេញគម្រោង ជាហេតុធ្វើឲ្យក្រុមហ៊ុន ត្រូវធ្វើការសម្របសម្រួលជាមួយពួកគាត់ ដោយទូទាត់ជាថវិកា តាមការព្រមព្រៀងជូនពួកគាត់ទៅតាមទំហំដីជាក់ស្តែង ដែលគាត់បានអាស្រ័យផល ដោយមិនមានការគាបសង្កត់ ឬបង្ខិតបង្ខំរំលោភបំពានពួកគាត់ឡើយ ហើយរហូតមកដល់ពេលនេះ ក្រុមហ៊ុនបានទូទាត់ថ្លៃដីតាមការព្រមព្រៀងបានប្រមាណជា ១៤៣៦ ហិកតា ស្មើនឹង ៨៥ ភាគរយ នៃផ្ទៃដីសរុប។
នៅតំបន់នេះ មានវិសាលភាពធំធេង ទើបក្រុមហ៊ុនបានតម្លើងម៉ាស៊ីនដែលអាចសម្ងួតស្រូវបាន ២៧០ តោន ក្នុងមួយថ្ងៃ និងអាចសម្ងួតស្រូវរបស់ប្រជាពលរដ្ឋក្នុងតំបន់នេះទៀតផង។
ទន្ទឹមនឹងនេះ ក្រុមហ៊ុននៅជួបបញ្ហារាំងស្ទះខ្លះៗ ដែលមិនអាចអនុវត្តបានតាមគម្រោង ដោយកន្លែងខ្លះ ក្រុមហ៊ុនត្រូវរៀបចំប្រព័ន្ធធារាសាស្ត្រ ប៉ះចំដីប្រជាពលរដ្ឋ ដែលគាត់កំពុងអាស្រ័យផល ស្ថិតក្នុងគម្រោងអភិវឌ្ឍន៍ តែគាត់នៅមិនទាន់ទទួលយកថវិកាសម្របសម្រួលថ្លៃដីពីក្រុមហ៊ុននៅឡើយ ហើយបើទោះបីជា ក្រុមហ៊ុនបានរៀបចំដីស្រែយ៉ាងសមរម្យ ធានាប្រភពទឹកគ្រប់គ្រាន់សម្រាប់ដោះដូរជាមួយគាត់ក៏ដោយ ក៏គាត់មិនព្រម ជាហេតុធ្វើឲ្យក្រុមហ៊ុន ត្រូវផ្អាកការសាងសង់ប្រព័ន្ធធារាសាស្ត្រទាំងនោះ ដោយមិនធ្វើឲ្យប៉ះពាល់ដល់ដីស្រែប្រជាពលរដ្ឋឡើយ៕H/N
